ТАБРИКОТИ РОҲБАРИ МАЪМУРИЯТИ МИНТАҚАИ ОЗОДИ ИҚТИСОДИИ «ДАНҒАРА» БА МУНОСИБАТИ ТАҶЛИЛИ 29-СОЛАГИИ РӮЗИ ВАҲДАТИ МИЛЛӢ

Ҳамватанони гиромӣ!
Имрӯз дар Тоҷикистони соҳибистиқлол бо шарофати сиёсати ваҳдатофари Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 29-солагии Рӯзи Ваҳдати миллӣ дар фазои сулҳу субот, оромӣ ва пешрафти устувор ҷашн гирифта мешавад.
Ба ин муносибати фархунда тамоми мардуми шарафманди Тоҷикистони азизро самимона табрик намуда, ба ҳар яки Шумо саломатии бардавом, хушбахтӣ, сарбаландӣ, файзу баракат ва комёбиҳои нав ба нави меҳнатиро орзу менамоям.
Ваҳдати миллӣ ва Истиқлоли давлатӣ барои эҳё ва таҳкими давлатдории миллӣ, бунёди ҷомеаи демократӣ, ҳуқуқбунёд, дунявӣ ва ягона заминаи устувор фароҳам оварданд. Маҳз ҳамин арзиши муқаддас ба Тоҷикистон имконият дод, ки роҳи рушди устуворро интихоб намуда, сиёсати сулҳҷӯёна ва ҳамкориҳои созандаро бо ҷомеаи ҷаҳонӣ густариш диҳад ва ҷойгоҳи шоистаи худро дар арсаи байналмилалӣ касб намояд.
Боиси ифтихори ҳар як шаҳрванди Тоҷикистон аст, ки сиёсати сулҳпарваронаи давлати мо имрӯз дар сатҳи байналмилалӣ низ эътирофи васеъ пайдо намудааст. Қабули Қатъномаи Маҷмаи Умумии Созмони Милали Муттаҳид оид ба эълон гардидани солҳои 2027–2036 ҳамчун «Даҳсолаи байналмилалии таҳкими сулҳ ба хотири наслҳои оянда», ки бо ибтикори Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон пешниҳод гардида, бо иттифоқи оро пазируфта шуд, далели равшани эътирофи нақши Тоҷикистон ҳамчун кишвари сулҳпарвар ва ташаббускори масъалаҳои муҳими ҷаҳонӣ мебошад. Ин ташаббуси таърихӣ ҷомеаи ҷаҳониро ба таҳкими муколама, ҳамкории созанда, эҳтироми ҳуқуқи байналмилалӣ ва таъмини сулҳу суботи пойдор ба хотири зиндагии шоистаи наслҳои имрӯзаву оянда ҳидоят менамояд.
Ба шарофати ваҳдат Тоҷикистони соҳибистиқлол аз марҳилаҳои душвори таърихӣ сарбаландона гузашта, имрӯз ба кишвари ободу пешрафта табдил ёфтааст. Тоҷикистон ҳамчун давлати соҳибтамаддун ва сулҳпарвар барои ҳифзи арзишҳои миллӣ, забон, фарҳанг ва таърихи куҳани тоҷикон саҳми арзанда гузошта, ҳамчун хонаи умед ва ифтихори тамоми тоҷикони ҷаҳон эътироф гардидааст.
Ваҳдати миллӣ барои эҳёи фарҳанги миллӣ, таҳкими худшиносӣ ва худогоҳии миллӣ, рушди илму маориф, фарҳанг ва фароҳам овардани фазои ҳамдигарфаҳмӣ дар ҷомеа мусоидат намудааст. Имрӯз шаҳрвандони кишвар новобаста аз миллату мазҳаб дар фазои дӯстиву бародарӣ зиндагӣ намуда, дар роҳи ободии Ватан саҳми арзандаи худро мегузоранд.
Бо талошҳои пайвастаи роҳбарияти олии мамлакат ва меҳнати содиқонаи мардуми Тоҷикистон дар солҳои аввали истиқлол барои рушди иқтисодӣ ва иҷтимоии кишвар заминаҳои устувор гузошта шуданд. Амалӣ гардидани лоиҳаҳои муҳими стратегӣ, аз ҷумла бунёди роҳҳои байналмилалӣ, нақбҳо, неругоҳҳои барқи обӣ ва дигар иншооти муҳими давлатӣ маҳз самараи сулҳу ваҳдат ва сиёсати созандаи давлату Ҳукумат мебошад.
Президенти Ҷумҳурии Тоҷикистон муҳтарам Эмомалӣ Раҳмон борҳо таъкид намудаанд, ки ваҳдати миллӣ ҷавҳари асосии истиқлолият мебошад. Дар ҳақиқат, истиқлолият ва ваҳдати миллӣ мафҳумҳое ҳастанд, ки якдигарро такмил медиҳанд ва пешрафти давлат маҳз аз устувории ин ду арзиши муқаддас вобаста мебошад.
Таърих собит намудааст, ки сулҳу субот ва ризоияти миллӣ ба осонӣ ба даст наомадааст. Барои расидан ба ин рӯзҳои осоишта мардуми тоҷик роҳи пурмашаққатро тай намуда, бо иродаи қавӣ ва ҳисси баланди ватандӯстӣ барои ҳифзи давлат ва миллат талошҳои бузург анҷом додааст. Аз ин рӯ, ҳифзу таҳкими ваҳдати миллӣ вазифаи муқаддаси ҳар як шаҳрванди кишвар мебошад.
Имрӯз мо ифтихор мекунем, ки Тоҷикистон дар партави сиёсати хирадмандонаи Пешвои миллат ва бо шарофати ваҳдати сартосарӣ ба дастовардҳои назарраси иқтисодӣ, иҷтимоӣ, фарҳангӣ ва сиёсӣ ноил гардида, дар роҳи рушди устувор бо қадамҳои устувор пеш меравад.
Боварии комил дорам, ки мардуми сарбаланди Тоҷикистон минбаъд низ арзишҳои сулҳу ваҳдат, дӯстиву ҳамдигарфаҳмӣ ва ватандӯстиро ҳифз намуда, барои ободии Ватани азизамон ва баланд бардоштани нуфузи он дар арсаи байналмилалӣ саҳми арзандаи худро мегузоранд.
Бори дигар тамоми ҳамватанони азизро ба муносибати 29-солагии Рӯзи Ваҳдати миллӣ самимона табрик гуфта, ба ҳар як хонадони тоҷик сулҳу оромӣ, тандурустӣ, саодати зиндагӣ ва ба Тоҷикистони маҳбубамон пешрафту шукуфоии рӯзафзун орзу менамоям.
Ҷашни фархундаи Рӯзи Ваҳдати миллӣ муборак бошад!