ТАБРИКОТ Роҳбари Маъмурияти минтақаи озоди иқтисодии «Данғара» Собирзода Ҷамшед Абдусаид ба муносибати Иди саиди Фитр

Ҳамдиёрони азиз!
Мардуми шарифи Тоҷикистон!
Бо камоли эҳтиром ва самимият ҳамаи Шуморо ба муносибати фарорасии Иди саиди Фитр — яке аз ҷашнҳои муқаддас ва пурифтихори мардуми мусалмон, ки рамзи покӣ, инсондӯстӣ, сабру таҳаммул ва эҳтироми ҳамдигар мебошад, табрику таҳният менамоям.
Иди саиди Фитр ҳамчун анҷоми моҳи мубораки Рамазон фаро мерасад — моҳе, ки ҳар як инсонро ба худсозӣ, таҳкими ахлоқи ҳамида, сабру бурдборӣ ва анҷоми амалҳои нек раҳнамоӣ мекунад. Рамазон мактаби бузурги маънавият буда, инсонро ба сӯйи некиву накӯкорӣ, парҳезгорӣ ва эҳтироми арзишҳои волои инсонӣ ҳидоят менамояд.
Иди Фитр ҳамчун рамзи ҷамъбасти ин мактаби бузург мардумро ба ҳамдигарфаҳмӣ, бахшиш, меҳрубонӣ ва дастгирии якдигар даъват мекунад. Дар ин рӯзи муборак аёдати падару модар, хешу табор, ҳамсоягон ва дастгирии ниёзмандон нишонаи фарҳанги баланди инсондӯстӣ ва ваҳдати иҷтимоӣ мебошад.
Бо шарофати Истиқлоли давлатӣ ва сиёсати хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, таҷлили Иди саиди Фитр дар кишвари мо ба як анъанаи неку устувор табдил ёфтааст. Имрӯз шаҳрвандони мамлакат имконият доранд, ки арзишҳои динии худро озодона ба ҷо оварда, фазои сулҳу оромиро ҳифз намоянд.
Иди саиди Фитр ҳамчунин фурсати муносибест барои таҳкими ваҳдати миллӣ, ҳамбастагӣ ва дӯстии мардум. Дар шароити ҷаҳони муосир нигоҳ доштани сулҳу субот, эҳтироми ҳамдигар ва ҳамдигарфаҳмӣ аҳамияти махсус дорад.
Қобили зикр аст, ки дастгирии табақаҳои ниёзманди ҷомеа, аз ҷумла ятимону камбизоатон, яке аз суннатҳои неки ин иди муборак ба шумор меравад. Ин амалҳои хайриявӣ ҳисси ҳамдардӣ ва масъулиятшиносиро дар ҷомеа тақвият мебахшанд.
Бо истифода аз ин фурсати фараҳбахш ба ҳамаи Шумо саломатии бардавом, рӯзгори обод, ризқи фаровон ва комёбиҳои беназир орзу менамоям. Бигзор дар ҳар як хонадон фазои сулҳу оромӣ, меҳру муҳаббат ва эҳтироми якдигар ҳукмфармо бошад.
Орзу дорем, ки ҳамаи ибодату дуоҳои Шумо дар моҳи шарифи Рамазон мавриди қабули даргоҳи Илоҳӣ қарор гиранд ва Иди саиди Фитр ба ҳар хонадони тоҷик файзу баракат ва шодию нишот оварад.
Бори дигар ҳамаи Шуморо ба муносибати ин иди саид самимона табрик гуфта, бароятон тандурустӣ, хушбахтӣ ва муваффақиятҳои нав ба нав таманно менамоям.
Иди саиди Фитр муборак!